IIT-Guwahati Director thar T. G. Sitharam chuan an institution-in a huam zauhna atan hmarchhak hmun danga extension centre  hawn belh a rua­hman tih a sawi.

T. G. Sitharam hi IIT-Guwahati Director tur hian ruat thar a ni a, July 1 aṭang khan charge a la a ni. Zirtawpni khan thuthar thehdarhtuten an kawmnaah hemi chung­chang hi a sawi a, mahse a ruahmanna ti­puitling tur chuan Mi­nistry of Human Resource Development (HRD) remtihpuina a ngai dawn tih a sawi a ni.

Sitharam chuan IIT-G chuan amahin brand a insiam tawh tih sawiin, khawvel pum angah pawh university rank sang pawl a ni tawh tih a sawi. Infrastructure an neih angte pawh chu world class a nih thu leh research tih nan pawh a ṭha hle tih sawi bawkin; state-of-the-art scientific leh engineering facility an neih thu a sawi.

Hemi a nih avang hian an institution chuan hmarchhak state hrang hrang sorkarte chu an buaina chinfelna kawngah a pui thei dawn a ni, a ti.

Hmarchhak hmun danga extension centre hawng tur chuan thu­neitute remtihpuina ngai mah se theih tawp an chhuah dawn tih a sawi.

Sitharam chuan IIT-G chu kum nga lo kal leh tur chhung hian khawvel university ṭha top 100 zingah lang se a duh thu a sawi bawk. 

Share this Post