Pathianin hun ṭha zawk min pe leh ang - MNF President

MNF president Zoramthanga, chief minister chuan nimin zing khan Salem Veng, Aizawlah an party zawm tharte a lawm lut a; MNF chu Pathianin rorelna hun ṭha zawk a pek leh an beisei thu a sawi.

Zoramthanga chuan, hripui leh harsatna chi hrang hrang Pathianin a paltlangtir a, tun hun a hruai thleng tih sawiin, "Hun harsa atan chauh ni lo, hun ṭha zawk, ram tan nasa lehzuala hna thawh theihna hun min pe leh ang tih beiseina nen, Pathian leh mipui zarah kumin inthlanpui lo awm turah pawh sorkarna kan chan leh ngei ka ring," a ti.

ZPM chu mipuiin an hriat chian hnuah an chhuahsan mek zel nia sawiin Zoramthanga chuan, 'enchhin' tih thupui hmanga mipui hnena inzuarte chu anmahni chhungkuaa roreltu sangte ngei pawhin enchhin tlak an ni lo tih an hmu chhuak tawh a ti a; "Kan zui hi kan hre chiang ta em a, kan lo chhuak ta mai a ni, tiin an chhuahsan mek zel," a ti bawk.

Chief Minister hian Mualpuia Slaughter House chhehvela cheng mipuite'n inkalpawhna kawng chungchanga harsatna an tawh mekte a hmunah a enfiah nghal a ni.