Meghalaya-ah zin mite hip nan PRIME tourism vehicle tlangzarh

Meghalaya Chief Minister, Conrad K Sangma chuan June 30 khan zin mite hipna turin motor ṭha chi, PRIME Tourism Vehicle a tlangzarh. Hemi atan hian motor 50 ruahman niin, Chief Minister chuan a thawhkhatna atan motor 16 a tlangzarh a ni.

Mi hausa zin mite zingah, an cham chhunga nuamsa zawka veivah duhna a len tak avangin PRIME Tourism Vehicle programme hi Meghalaya sorkar chuan a kalpui a ni.

State sorkar chuan he programme a kalpui hma hian market research neiin, Meghalaya sokar tourism department-te, tour operator-te leh zin mite a biak rawn hnuah, zin mite tana veivahna nuamsa a awm loh thu an zir chhuak. Mi hausa zin mite hip tur leh an mamawhte phuhru turin, Meghalaya tourism department chuan 'PRIME Tourism Vehicle' scheme chu a tlangzarh. He scheme hian entreprenuer-te, tour operator-te leh tourism cooperative society-te a thlurbing ang.

Tlangzarh inkhawmah hian Chief Minister Sangma chuan 'PRIME Tourism Vehicle' scheme chu phurawm a tih thu sawiin, "Meghalaya-a tourism ṭhan lenna tur atana hmasawnna pawimawh tak, Prime Tourism Vehicles scheme kalpui hi kan phur hle. Kan state min tlawhtute tan veivahna nuamsa leh him chhawp chhuahsak a, hun hriatreng tlak siamsak hi kan tum ber a ni. He kan hmalakna hi economy ṭhan lenna tur a nih bakah, entrepreneur-te leh driver-te hna siam belhin, state pumah hmasawnna a thleng dawn a ni," tiin a sawi.