Naga-te Indian flag hman luih tir hi thil huatthlala tak a ni : Naga-American Council

Naga-American Council chuan Naga hnamten an flag chu pawmsak tura sorkar laipui an nawr mek laia, Naga-te Indian flag hman luih tir chu thil huathlala tak a ni tiin an sawi.

Sorkar laipuiin Naga political issue-a palai atan a ruat, AK Mishra leh NSCN-IM hruaituten Dimapur-a inbiakna an chhunzawm leh hnuah Naga-American Council chuan thuchhuah hi an siam a ni. Naga flag chu eng pawl tan mah ni loin, India leh Burma rama cheng Naga hnam pum aiawh a ni, an ti.

"Naga flag hian kum 75 chhung Naga-ten ro inrelna hran nei tura an beihna lantirna a ni," tiin India sorkar hnenah Naga flag pawm tura an nawrna chu tihtak zeta ngaihtuah a, Naga mipuite rilru-a pawimawh zia hriaa pawmsak turin an ngen bawk.

Sorkar laipui leh NSCN-IM hian hun rei tak remna zawnga inbiakna nei tawhin, inremna pawh a siam hnai tawh nia sawi a ni fo. Mahse NSCN-IM lamin Naga flag leh constitution hran an phutna chu sorkar laipui hian a pawmpui thei lo a ni.