2019 Pulwama inbeihna thleng kha PM Modi tih dik loh a ni : Ex-Meghalaya Governor

Meghalaya governor hlui, Satya Pal Malik-a'n kum 2019-a Pulwama, Jammu and Kashmir-a inbeihna thleng chungchanga thu dik tak tia a sawi chuan sawizui a hlawh hle.

Kum 2019, February thla khan Pulwama-ah hian firfiakten sipaite chuanna bus chu bomb phurtu motor in an su a, a puak zui a ni. He inbeihna thlengah hian central reserve police force (CRPF) 40 an thi a ni.

Meghalaya governor hlui chuan Pulwama-a thil thleng hi union home ministry lam inthlahdah vang, sorkar laipui rintlak tawk loh vang a ni, a ti. Malik hi Pulwama-a sipaite beih an nih lai hian Jammu and Kashmir-ah hian Governor a ni.

Malik chuan CRPF hian sipaite hruaina atan hian aircraft a dil a, mahse union home ministry-in a lo hnawlsak a ni, a ti. An kalna kawng pawh enfiah ṭhat tawk a nih loh thu a saiw bawk. Pulwama inbeihna thlen hnu lawkah prime minister Narendra Modi-a'n a biak pawhin thil fel tawk lo chungchang hi a lo hrilh tih a sawi bawk. Mahse PM hian engmah sawichhuak lo a, midang tumah hrilh lo turin a hrilh zui niin a sawi. PM bakah National Security Advisor Ajit Doval pawhin thil fel tawk lo awm chu sawichhuak lo turin a hrilh bawk tih Malik chuan a sawi.

PM leh Doval-ten an biak hnuah, he pawikhawihna thleng chungchangah hian dem pumhlum a, BJP leh sorkar laipui chuan inthlanna lo hlawkpuina atana hman an tum tih a hrethiam ta nghal tih Malik chuan a sawi zui a ni.

Pulwama thil thlengah hian intelligence lam pawh an hlawhchham nia sawiin, sipaite chuanna bus sutu car- khan RDX explosive kg 300 vel zet a phur a, Pakistan ram aṭanga rawn lut ni mah se pawikhawihna thlen hma ni 10-15 chhung vel chu Jammu and Kashmir-a khaw hrang hrangah man chhuah lohin a tlankual tih a sawi bawk.