AP-ah ITBP battalion thar 6 dah dawn

Sorkar laipuiin Indo-Tibetan Border Police (ITBP) battalion pasarih a din thar tur zinga battalion paruk chu Arunachal Pradesh-ah dah an ni dawn.

Kumin February thla khan Cabinet Committee on Security (CCS) chuan ITBP battalion thar pasarih din hi phalsakin, heng battalion tharah hian sipai 9,400 an awm dawn a ni. AP-a battalion dah turte hi kum 2025-26 ah dah fel hman beisei an ni.

Tun hnaiah Arunachal Pradesh chungchangah India leh China an inep thar leh a, China hian AP-a a ram chin nia chhalin, state chhunga hmun 11 chu China sorkar chuan an hming phuahin a list pawh a tichhuak a ni. India chuan China list tihchhuah hi a pawm loh thu a sawi ve nghal bawk. Hemi hnua union home minister Amit Shah-a'n AP a tlawh chu China hian rawn sawisel zui nghalin, China-in a ram chhunga thuneihna a neihte zah lo leh bawhchhiaah India a puh. Central lama hruaitute'n AP an tlawh hi China chuan a ngaimawhin, a sawizel fo a ni. Mahse India chuan Arunachal Pradesh chu India ram chhung a ni a, a ni reng dawn tih a sawi thung.

India leh China inrina hi km 3,488-a thui niin, middle sector hi India lama Uttarakhand leh Himachal Pradesh inkar leh, China lama Tibet autonomous region-ah awmin, eastern sector India rama Arunachal Pradesh leh Sikkim inkar, Cina lama Tibet autonomous region-ah a awm a ni. Ladakh-ah China ramri hi km 1,597-a thui niin, Arunachal Pradesh nena inrina hi km 1,126-a thui a ni. Arunachal Pradesh hian China bakah Myanmar leh Bhutan a ri bawk a, AP-a international border thui zawng hi km 1,863 a tling.