Manipur-a bomb puakah mi 5 an hliam

Manipur-a Ukhrul district-ah Thawhṭanni zan khan bomb a puak a, mi panga an hliam.

Police-te sawi danin, bomb hi zan dar 6:23 khan khaw chhung hmun laili lai, Viewland Church Gate bulah a puak niin an sawi. Bomb puahna bula awm, inhlawhfa mi panga ten hliam an tuar a, damdawi-in panpui nghal an ni. Hliam tuarte hi Bihar aṭanga inhlawhfaa kalte an ni. An zinga pahnihte chu an dinhmun a ṭhat loh avangin nimin khan Imphal lam panpui an ni.

Bomb puahna hmun hi police-ten endik nghalin, pawikhawihtu pawh chhui zui mek a ni. Nimin thleng khan eng pawl mahin bomb tipuaktu an nih thu an la sawi lo.

Kar hnih liam ta khan Ukhrul district headquarters-a mini secretariat-ah IED tihpuah a lo ni tawh bawk.

Sorkar laipui chuan tun hnai khan Manipur-a police station pali huam chhung chu boruak a ṭha chho zel nia sawiin 'disturbed area'-a a puanna chu a titawp a ni. Thla ruk dana disturbed area-a puante dinhmun a ennawn ṭhinnaah, state chhunga police station 19 hnuaiah Armed Forces (Special Powers) Act, 1958 hman chu tihtawp a ni tawh.