Meghalaya BJP-in anti-Christian nia puhna an chak loh chhan niin ngai

Meghalaya BJP hruaitu leh cabinet minsister AL Hek chuan BJP chu Kristian sakhua dodal, anti-Christian nia mipuite an ngaihna chu assembly inthlan neih zawh taka an chet ṭhat tawk lohna chhan niin a sawi.

Al Hek chuan mipuiten BJP an hmuh dan dik lo tak chu tihtawp a ngai a ni tiin, hma an la mek tih a sawi. Prime minister Narendra Modi-a'n Vatican City a tlawh te, Pope Francis nen meeting an neihte chuan BJP chu Kristian sakhua dodaltu a nih loh zia a tilang chiang hle a ni, tiin a sawi bawk.

Meghalaya assembly inthlan neih zawh takah BJP hian seat hnih chauh an la pha a, hma an sawn theih lohna chhan chu Kristian tamna state-a mipuiten BJP an hmuh leh ngaih dan a dik loh vang a ni, a ti.

State BJP president Ernest Mawrie pawhin politics lama an khingpuiten an party beihna atan inthlan dawnah BJP chu anti-Christian tiin an sawi uar hle, tiin assembly inthlan neih zawh taka an party dinhmun thlira meeting an neihah a sawi a ni.