Assam-ah Yaba tablet Rs vbc 50 hu an man

Assam police-te chuan Thawhṭanni khan Cachar district-a in pakhatah ruihhlo, Yata tablet nuai nga an man a, an ruihhlo man hi cheng vaibelchhe 50 man hu a ni. Ruihhlo neitu nia puh mi pahnih an man bawk.

Police-te chuan Yaba tablet hi Myanmar ram aṭanga lakluh niin, Mizoram kaltlangin Assam-ah an phur lut a, state hrang hrangah thawndarh an tum niin an sawi.

Cachar superintendent of police Numal Mahatto chuan, thu an dawn bawhzuiin, Thawhṭanni zing khan Silchar khaw dai, Bhagadahar-a Rubel Hussain Mazumder (32) chenna in an dap a, Yaba tablet tam tham tak hi an man tih a sawi. Rubel bakah a nau, Saidul Hussain Mazumder (30)-te chu an man nghal a ni.

Police-te chuan Cachar district-a ṭum khata ruihhlo an man tam ber a nih thu sawiin, he thilah hian midang inhnamhnawih pawh an awm ngei an ring. SP chuan, "Thla sarih chhungin ruihhlo hi Rs vbc 1,200 man hu kan man tawh a, ruihhlo zuar leh tawlhnaa inhnamhnawih mi 100 chuang kan man tawh bawk," a ti.

Assam chief minister Himanta Biswa Sarma chuan social media-ah Cachar police-ten ruihhlo tam tham tak an man thu hi sawiin, police-te chu a fak hle. An hnathawh zelna turah pawh ṭha taka thawk chhunzawm zel turin a fuih.

Thawhṭanni zan khan Assam police-te chuan Assam-Tripura border bul, Karimganj-ah khuh damdawi,Rs nuai 10 man hu an man bawk.

Police-te chuan Guwahati aṭanga Agartala pan tur, motor pakhat an dapnaah Phensedyl (cough syrup), bur 2,000 an man an sawi. Driver Ranjit Baishya pawh manin thu zawhfiah nghal a ni.

Manipur-ah WY tablet kg 11 leh heroin man

Assam Rifles leh Manipur police joint team chuan Indo-Myanmar border-a hmun hrang hrang an dapnaah WY tablet kg 11.1 leh heroin gram 500 an man tih Thawhṭanni khan an sawi. An ruihhlo man hi international market-ah Rs vbc 11 man hu a tling.

Joint team hian a hmaa Chandel district-a ruihhlo tawlhru an mante hnen aṭanga an thu hriatte bawhzuiin, Pathianni aṭang khan darkar 36 chhung ramri hmun hrang hrang hi an dap kual a ni. Moreh-a ward number 2 Namnong Veng a Lalpolao Haokip chenna inah WY tablet kg 11.1 leh heroin gram 377 an man. Hei bakah hian Chandel district-a Changpol-Gamphazol road junction-a motor pakhat an dapnaah heroin gram 264 an man bawk a ni.