Manipur-in Myanmar ramriah venhimna tikhauh

Manipur sorkar chuan ramri hnaihvai, Myanmar ram chhunga buaina a punlun chhoh zel vangin ramri vengtu sipai a dah belh. Ramri vengtu Assam Rifles-te pawh khauh taka veng turin a chah bawk.

Sorkar official chuan Myanmar lam aṭangin lut ru an awm hriat a ni rih lo tih a sawi a, mahse Myanmar ram chhung buaina a zual zel avangin international border veng tur hian AR-te bakah Manipur Rifles, police leh security force dangte dah belh a ni, a ti. Manipur leh Myanmar inrina hi km 400 vel hung loh a la awm a ni.

Myanmar sipai leh sipai rorelna dodaltu, helpawlte an la inbei chhunzawm reng a, ramri hnaihahte an inbei tawh a ni. Kar liam ta Ningani khan Myamnar sipaite chuan Sagian region-a Kauntong khuaa People Defence Force (PDF) camp an bomb nia sawi a ni. Hei hi Manipur ramri aṭanga km 4 vel chauha hla, border pillar 81 ep mai a ni. Myanmar sipai fighter jet-in PDF camp hi ṭum li a bomb a, hei bakah Mi-35 helicopter pawh camp chung lamah a thlawk kual bawk niin an tarlang. Camp beihnaah hian mi pathum an thi nia sawi a ni.

PDF hi Myanmar sipai sorkar a din hnua sipai rorelna dodaltuten an din niin, khua leh bial hrang hrangah an awm. Civil sorkar aiawhtu atana din, National Unity Government (NUG) pawhin a pawmpui a ni. Mahse sipai sorkar chuan NUG hi dan loa din tiin, PDF pawh firfiak pawlah a puang bawk. Manipur hnaih lam, Kaly leh Tamu bialah PDF fighter hi 5,000 vel an awm a, mahse ralthuam erawh an nei ṭha lo nia sawi a ni bawk.

Manipur sorkar hian tun hnaiah tribal helpawl pathum nena inkahhai a puan aṭangin a lo inhnukdawk tawh bawk. Heng tribal pawlte hi Myanmar-ah inkhuarin, inkahhai an puan chhung pawhin an pawl hruaitute chu Manipur state-a pawikhawihna leh dan loa thiltihnaah an inhnamhnawih reng nia puhin, an inremna siam aṭang hian a inhnukdawk a ni.

Chief minister N Biren Singh chuan Myanmar aṭanga dan loa pem luh tum, ruihhlo leh dan phal loh thil dangte tawlhluh tum ṭhin venna turin border-ah outpost siam belh a nih tur thu a lo puang tawh bawk.