RSS hnuaia tribal pawlin sakhaw inleh duh lohna lantir

Rashtriya Swayamsevak Sangh (RSS) hnuaia Assam tribal pawl, Janajati Darma Sanskriti Suraksha Manchi (JDSSM) chuan Pathianni khan Guwahati-a sakhaw inleh duh lohna lantirin rally lian tham tak an buatsaih.

Rally-a telte hian state chhunga tribal zingah sakhaw inleh khap an phut thu an sawi. Tribal, sakhaw danga inlette chu Scheduled Tribe (ST) aṭanga paih a, ST hminga hna lakna leh sorkar aṭanga hamṭhatna an dawn ṭhinte pawh tihtawp sak vek an phut tel bawk. Constitution-a Article 342A siamṭhat an phut a ni.

Pawl hotu, Binud Kumbang chuan, "India rama sakhaw inlehna thleng ṭhin hi independence hma aṭang tawhin ST-te tan a him lo hle a ni. Assam-a tribal hnam hrang hrangte ram pawn lam sakhua zawm an inlet ṭhin hi thil thleng thar a ni lo," tiin sakhaw danga inlet hi an pung chho zel tih a sawi. "Ram dang sakhaw pawlte chuan tribal-te hi rawn thlurbingin, an bum awlsam berte an ni," a ti.

India ramah hmarchhak bial chu Kristian tamna hmun a ni tih sawiin, kum 2011 chhiarpuiah ram puma Kristian vaibelchhe 2.78 awm zingah, nuai 78 chu hmarchhak biala mi an ni tiin, Kumbang chuan a sawi.

Tribal pawlin rally an huaihawt hi Assam state-a sakhaw inleh khapna dan, anti-conversion law siam a nih theihna atan boruak a siamna niin political analyst-te chuan an ngai thung.