Dan palzut vangin Manipur-a Senapati DC hrem phût
Manipur-a Senapati district-a civil society organisation chuan Covid-19 dan zamte a zawm loh avangin deputy commissioner (DC) chu hrem turin sorkar an phût.
Chief minister N Biren Singh hnenah civil society organisation pathum - Naga People’s Organisation (NPO), Senapati District Women Association (SDWA) leh Senapati District Students’ Association (SDSA)-te chuan lehkha thehlutin, Senapati DC Soalam Somorjit hremna pe turin an ngenna tihhlawhtling turin sorkar chu darkar 48 hun an pe a ni.
DC Somorjit hi Mumbai aṭanga tangkhang haw, mi 36-te chuanna bus chhunga a awm lai thlalak chu social media lamah a darh a ni. Civil society organisation-te chuan May 13 khan DC hian 'no entry hour' laiin tangkhangte phurtu bus hi Imphal-ah a luh a phalsak tih an sawi. DC chu hri leng laka himna tura dan siamte zawm loah puhin, tlan luh phal loh lai a ni chungin bus hi a dintir duh lo a, quarantine centre atana ruat ni lo, multi-purpose hall-ah zanriah a lo buatsaih sak bawk niin an sawi.
Senapati district-a chengte chuan tangkhang hruai hawte hi khuahkhirh ṭhat an ni lo a, public ATM booth, thingpui dawr leh dawr dangahte zalen takin an kal phalsak an ni bawk niin an sawi a ni.