Meghalaya budget session zawhah Assam nen border talk nei chhunzawm dawn

Meghalaya chuan budget session an zawhah, Assam nena ramri chungchanga inbiakna chu an nei chhunzawm tawh dawn tih a sawi.

Meghalaya legislative assembly budget session hi March 28 hian an zo dawn a, "Budget session a zawh veleh, border talk hi kan nei nghal tawh dawn a ni," tiin sorkar thu­puangtu, minister Paul Lyngdoh chuan a sawi a ni.

Assam sorkar chuan state pahnihte ramri chungchanga buaina an neih mek chhunga mi, Mukroh khua chu an state chhung niin tun hnaiah a sawi leh a, mahse Meghalaya deputy chief minister Prestone Tynsong chuan chhang let nghalin, Mukroh chu Meghalaya ram chhung ngei a ni tih a sawi. Nikum November thla khan Mukroh-ah Assam police leh tualchhung mite inkara buaina chhuak vangin mi paruk an thi a, mi dang eng emaw zatin hliam an lo tuar tawh a ni. Thi zinga panga hi Meghalaya mi an ni.

Assam assembly session-a BJP MLA Bidya Sing Engleng zawhna a chhannaah, Assam chief minister Himanta Biswa Sarma chuan Mukroh khua chu Assam ram, West Karbing Anglong district huamchhunga mi a ni tih a sawi. Hemi rual hian buaina chhuak hi ramri kaihhnawih thil ni loin, Meghalaya aṭanga thingzai phur rutute leh Assam police-te inkar zawk a nih thu a sawi bawk.

Mukroh khuaa buaina chhuakah; thi an awm hnu hian state pahnihten ramri buaina chinfelnan inbiakna an neih pawh a bahhlah phah zui a ni.