Sikkim palaiten AP-ah e-ILP system zirchiang

Sikkim sorkar palaite chuan kar liam ta khan Arunachal Pradesh state tlawhin, e-ILP leh online ILP project an zirchiang.

Itanagar-a Arunachal political principal secretary Kaling Tayen hoa meeting an neihah, Sikkim palaite hi an state dinhmun leh, ILP pekchhuah leh kalpui dan te, e-ILP portal chungchangte chu Arunchal team lamin chiang takin an hrilhfiah a ni. E-ILP portal hi nikum November 17 khan chief minister Pema Khandu-a'n a hawng a ni. He portal hian fak a hlawh hle a, national level-ah 'best government to citizen-centric service application' ah award pahnih an dawnpui tawh a ni. He system hian AP tourism dinhmun pawh a chawilar phah hle a ni.

Sikkim palaite chuan AP-in ILP system a kalpui dan chu ṭha an tih thu leh, an state-ah pawh hman ve ngei an duh thute an sawi ve bawk. Hemi kawnga pui tur hian Arunachal-a information technology & communication (IT&C) department chu an sawm nghal bawk.