Assam : Modi leh Hasina-te'n 'India-Bangladesh Frienship Pipeline' hawng
Prime minister Narendra Modi leh Bangladesh prime minister Sheikh Hasina-te chuan Inrinni khan Assam aṭanga Bangladesh rama diesel thawnna tur, India-Bangladesh Friendship Pipeline chu video-conferencing kaltlangin an hawng.
PM Modi chuan, 'Kum eng emaw liam ta aṭangin Bangladesh chuan hma nasa takin a sawn chho a, India mipuite pawhin hei hi kan lawmpuiin hma an sawnna kawnga kan lo pui thei hi kan lawm hle a ni," a ti. Pipeline an hawn tak chuan Bangladesh ram hmasawnna kawngah pawh a pui dawn a, ram pahnihte inpawhna ṭha tak lantirtu pawimawh tak a ni, tiin a sawi.
Ram pahnih hruaituten an hawn tak pipeline hmang hian Assam-a Numaligarh Refinery Limited (NRL) high speed diesel chu Siliguri, West Bengal-a NRL marketing terminal-ah lain, heta ṭang hian Bangladesh-a Dinajpur district-a Bangladesh Petroleum Corporation (BPV) hnuaia Parbatipur depot-ah thawn ṭhin a ni ang. Rel hmanga km 510 chuang kaltlanga diesel thawn ṭhin chu he pipeline hian a rawn thlak dawn a, he pipeline kaltlang hian kum khatah metric ton maktaduai khat thawn theih a ni ang. A thawnna senso pawh a tlem phah dawn hle bawk.
Km 130-a thui, pipeline project lungphum hi kum 2018 khan ram pahnih prime minister-te hian an lo phum tawh a, project thawhna atan hian Rs vbc 377.08 sen a ni. He project hmang hian Bangladesh chhim lam district 16-ten diesel supply mumal tak an nei thei dawn a ni. Pipeline km 125 hi Bangladesh ram chhungah awmin India ramah km 5-a thui siam a ni bawk. Bangladesh ram china pipeline siamna atan hian Rs vbc 285 sen niin, senso hi grant assistance hnuaia India sorkarin a tum vek a ni.