Manipur Sangai Festival 2022 ṭan a ni

Manipur Sangai Festival 2022 chu Thawhṭanni khan union minister of tourism, culture and DoNER G Kishan Reddy chuan a hawng.

Festival hawnna inkhawm hi Bihnupur district-a Sangai Ethnic Park, Moirang Khunou-ah neih a ni a, hei hi festival neihna pui ber tur a ni. Sangai Park bakah state chhung hmun hrang hrangah festival hi neih a ni dawn bawk a, November30 thleng a awh ang.

Union Minister Reddy chuan Sangai Festival-a a tel ve thei chu lawmawm a tih thu sawiin, hmun khata hnam hrang hrang 33-te hnena hun an hmang ho thei chu vannei a intih thu a sawi. India ram hmun hrang hrang amite pawh he festival hi chhim turin a sawm nghal a ni. Festival ropui tak an buatsaih theih avangin chief miniter N Biren Singh, cabinet minister, MLA leh official-te hmalakna a fak a, Sangai Ethnic Park-ah permanent structure siam a nih theihna turin prime minister Narendra Modi pawh a sawipui tur thu a sawilang bawk.

Chief Minister Singh pawhin thu sawiin, Sangai Festival chu inpumkhatna kut, Festival of Oneness atan hman a ni tih sawiin, state chhunga hnam hrang hrangte telna a ni tih a sawi. CM leh Union Minister-te hian hnam hrang hrangten traditional hut an siamte chu an tlawh nghal a ni.

Festival ṭanni hian coffee table book pahnih, Manipur Sangai Festival 2022 leh Manipur Today Special Edition on Sangai Festival te tlangzarh nghal a ni bawk.

Kumin hian festival hi Sangai Ethnic Park, Moirang Khunou bakah district paruka hmun 13-ah neih a ni dawn bawk. He festival hi kum 2010 aṭanga neih ṭan a ni. Covid hri leng vanga kum hnih chhung an chawlh hnuah, kumin hian an nei leh thei a, kum dang zawng aia puia nei turin an inbuatsaih a ni. Festival-ah hian World War II exhibition, film screening, flower show, theme park leh entertainment programme hrang hrang, 'Meet the Stars' tihte buatsaih a ni dawn a, naupangte pual intihhlimnate buatsaih a ni bawk ang.

Festival kharna inkhawm hi November 30-ah Hapta Kangjeibung-a Bhagyachandra Open Air Theatre-ah neih a ni ang.