Mega Food Park leh Mizoram
Sorkar laipuia Food Processing Industries minister Harsimrat Kaur Badal chuan tun hnai khan Khamranga Zoram Mega Food Park din thar chu video conferencing kaltlangin a hawng; MFP-ah mi 5,000 an thawh theih tur thu leh kut hnathawktu mi 25,000 velin hlâwkna an hmuh theih tur thu a sawi.
A hawngtu minister chuan, Zoram MFP-ah Core Processing Centre (CPC) leh Primary Processing Centre (PPC) a awm dawn thu sawiin, "CPC leh PPC-ah hian thawktu mi 5,000 vel (direct & indirect employment) a awm thei dawn a, food processing unit 30-ah cheng vbc. 250 hman a ngai dawn a, kum khat chhunga sum che vel (turnover) chu cheng vbc. 450-500 vel a ni ang," a ti.
Mizoramah thei leh thlai sawngbawlna hmunpui kan nei thar ta hi thil lawmawm tak a ni a, hetiang project lian a hlawhtlin theihna tura bul tumtu leh hnathawktute an fakawm hle a ni. He Mega Food park hi sorkar ta ni chiah lo mah se, sorkarin sum leh pai ṭhahnem tak hmanga a din a ni a, a hlawhtling thei a nih ngat chuan Mizorama kuthnathawktute tan kawl a eng dawn a ni.
Hetiang thil lian tham din tur hi chuan mithiam ṭhahnem tak an awm a ngai a, mi hausa intelkhawmin an din theih ngawt a ni lo. Tunah chuan a harsa ber an zo ta a, a hmunhma leh building an siam zo a, khawl an bun tawh a, hna an thawk ṭan thei ta. Sorkar lamin a thlir dan chuan mi 5000 velin he food park hmang hian ei an zawng thei dawn a, kuthnathawktu 25,000 vel zetin hlawkna an tel thei tura ngaih a ni.
Mizoramah hian sorkar laipui emaw, state sorkar emaw puihna hmanga thil kalpuitute hian a project-in a beisei zat eizawnna hi an siam mawh hle mai a, a sum senso ngaihtuahin a taka hlawkna teltu hi an tam ṭhin lo.
Zoram Mega Food Park hi chu tun hmaa project dangte ang lo takin a dintute tana hlawknaah tawp mai loin kuthnathawktute tana hlawkna tak tak thlentu ni thei se, Mizorama kan thlai leh thei thar chhuah state pawna kan thawn lian ṭhinte vawn ṭhatna remchang ni thei se, a sum senso a hautak ang bawkin kuthnathawktute tan hlawkna lian tham thlentu ni thei se a duhawm ngawt mai.