Tripura-a inkahna thlengah mi 2 hliam

Tripura khawpui, Agartala khaw dai Natun Nagar area-ah Thawhlehni zan khan inkahna a thleng a, mi pahnih an hliam.

Police-te chuan inbeihna hi Sonargaon Dhaba bula thleng niin an sawi a, automatic pistol hmangin ṭum li vel silai hi kah a nih thu an sawi. Hliam tuar zinga pakhat chu a keah kahfuh niin, pakhat chu a kawngah kah a ni bawk. Damdawi-inah enkawl mek an ni.

Hliam tuar pahnihte hi Soargaon Dhaba-ah hian zanriah an ei a, dawr aṭanga an chhuak chu silai hian kah an ni tih police-te chuan an sawi. He pawikhawihna thleng vang hian IPC leh Arms Act hnuaiah thubuai ziahluh nghal a ni bawk.

Police-te chuan he thil thleng hi chhui nghalin, nimin khan mi pahnih an man a, vawiinah court-ah hruai an ni ang.