Assam-a Miya museum hawn thar khartir leh nghal

Assam sorkar chuan Goalpara district-a All Assam Miya Parishad-ten Pathiannia museum an hawn thar, Miya musuem chu a khartir leh nghal.

Chief minister Himanta Biswa Sarma-a'n museum funding chungchanga zawhna a siam hnuah, district thuneitute chuan Lakhipur-a Miya museum kharna thupek hi an tichhuak nghal a ni. State sorkar chuan building hi Pradhan Mantri Awas Yojana (PMAY) scheme hnuaia sak a ni a, museum atana tih a ni lo tih a sawi.

Assam-ah hian Bengali ṭawng hmang Muslim, Bangladesh aṭanga rawn pem lut nia sawite hi 'Miya' an ti a, Assam mipui zinga 30% vel an tling tawh.

Chief Minister chuan state police-ten Miya museum siamna tura sum hmuh dan chu an chhuichiang dawn tih a sawi. He museum-a item pholante pawh chhui chian a nih tur thu a sawi bawk. Sarma chuan, "Miya museum-a item pholan hrang hrangte hi Assam mipuite hmanṭhin a ni. Sangha hmanna hmanrua an tarlante pawh Assam mite ta vek a ni," tiin Assam culture chhuhsak tumna a nih theih thu a sawi.

Museum-a item pholan hrang hrang zingah lungi chauh chu Miya hnam ta dik tak a ni tiin Assam CM chuan a sawi a ni.