Meghalaya : Sorkarin hydro electric project thawk turin power firm MoA ziahpui

Meghalaya sorkar chuan Wah Umiam Hydro Electric Project (50 MW) Stage-I leh Wah Umiam Hydro Electric Project (100 MW) Stage-II thawk turin North Eastern Electric Power Corporation Limited (NEEPCO) chu Memorandum of Agreement (MoA) a ziahpui.

Thawhdunna tura inremna hi Thawhlehni khan Pinewood Hotel, Shillong-ah Power Department leh NEEPCO-ten an ziak a, deputy chief minister Prestone Tynsong-a'n a telpui a ni. MoA-ah hian Power department-a joint secretary DD Shira leh NEEPCO-a director personnel Anil Kumar-ten an hming an ziak.

Deputy CM chuan NEEPCO chungah a lawmthu sawiin, thawhdunna tura inremna an ziah chu thil pawimawh tak , an state pawhin a hlawkpui ngei tur a nih thu a sawi. Sorkar chuan heng project-te hi a hun taka thawh zawh a nih theihna atan theihtawpin a thawhpui zel dawn tih a sawi bawk.

Tynsong chuan power lamah an state-in harsatna an tawk fo tih sawiin, state-in a mamawh 650 MW aṭangin 350 MW chauh an la siamchhuak thei a, power indaih lohna hi an tawk fo tih a sawi. State sorkar chuan power sector lam thuam chakna tur pawh a ngaihtuah reng a,kum hmasa lamahte pawh private sector-te chu thawhpuina tur inremna a lo siampui fo tawh a, mahse chhan hrang hrang vangin titawp a ngai leh ṭhin a ni, a ti. NEEPCO erawh chu government sector a nih avangin inremna an ziah chu paper-ah ziah chauh duh tawk loin, a taka hlenchhuah ngei a nih a beisei thu a sawi.