AP tana IAS cadre hran siam chungchang sorkarah thlen leh : CM Khandu

Arunachal Pradesh chief minister Pema Khandu chuan an state tana Indian Administrative Service (IAS) cadre hran siam chungchang chu sorkar laipuiah an thlen leh tih a sawi.

AP sorkar hian IAS, IPS leh IFoS cadre hran siamsak tur hian a hma pawhin sorkar laipui hi an lo ngen fo tawh a ni.

Nilainia state assembly rorel inkhawma hemi chungchang hi CM Khandu chuan sawichhuakin, assembly chuan kum 2017, October 18 khan resolution a lo siam tawh a, Ministry of Home Affairs (MHA) hnenah pawh an thlen nghal thu a sawi. MHA hian tihkhawtlai a la ni reng a ni, a ti.

State governor BD Mishra pawhin AP tana IAS cadre hran siam tur hian sorkar a lo nawr ve tawh bawk. Hei hi public administration leh sorkar rorelna ṭha zawk kalpuina atan a ṭangkai dawn ani, a ti.

Hemi rual hian AP atana IAS cadre hran siam a nih hma chuan, an state-a IAS leh IPS officer post-te chu a reilo berah kum nga tal ni turin a rawt bawk. Tuna an kalpui mekah chuan Arunachal Pradesh-a IAS leh IPS officer dahte hi kum thum chin an awm thei a ni.