Sorkar laipuiin NSCN(K) Niki nena inkahhai puan pawtsei

Sorkar laipui chuan Naga helpawl, National Socialist Council of Nagaland (K) Niki nena inkahhai a puan chu Nilaini khan kum khat dang a pawtsei.

NSCN(K) Niki hi Niki Sumi kaihhruai niin, kum 2015-a Manipur-a Indian Army sipai 18 thattua puhin, National Investigation Agency (NIA) chuan a lu manah Rs nuai 10 a lo phal tawh a ni.

Kum 2021, September thla khan NSCN(K) Niki leh sorkar laipui hian inkahhai an puang a,he inremna hi nimina tawp tur kha a ni. Mahse Nilaini khan kum khat dang, September 9,2022 aṭanga September 7, 2023 thleng atan inkahhai hi puan chhunzawm a nih thu Home Ministry thuchhuah chuan a tarlang.

Sorkar laipui hian kum 2015, August 3 khan Naga helpawl lian, NSCN-IM chu inremna zawngin, framework agreement a lo ziahpui tawh bawk. Framework agreement hi kum 18 chhunga inbiakna ṭum 80 chuang an neih hnuah an ziak a ni.

Mahse NSCN-IM lamin Naga tana flag leh constitution an phut chu sorkar laipui lamin a pawmpui thei lo a, hei vang hian inremna tluantling an la siam thei lo.

Sorkar hian NSCN aṭanga peng, pawl dangte pawh inkahhai a puanpui hnuah, inremna zawngin inbiakna a neihpui mek bawk. Sorkar nena inkahhai puang tawhte hi NSCN-NK, NSCN-R, NSCN K-Khango leh NSCN (K) Niki-te an ni.