Manipur ; Hill district-a ADC inthlan buatsaih Naga pawlin duh lo

United Naga Council (UNC) chuan Manipur-a district thar pasariha Autonomous District Council (ADC) inthlan a hrana buatsaih chu an duh lo tih an sawi.

Nilainia Imphal-a emergency presidential council meeting neihah he thutlukna hi an siam a ni.

UNC chuan district siam thar pasarihte sût leh tura sorkar an phutnaah an dinna a la ngai reng tih an sawi a, 6th and 7th Amendments of the Manipur (Hill Areas) District Council Bill, 2022 chu an pawm loh thu an sawi bawk.

Kum 1981, 1992, 1995 leh 1998-a Naga mipui leh Manipur sorkarin Memoranda of Understandings (MOUs) pali an lo ziah tawhte sawilang lehin, UNC chuan district thar din a nih dawn chuan a nghawng tur zawng zawngte biakrawn hmasak phawt an ni tur tih a ni, an ti. Mahse state sorkar chu verther taka chein, Naga mipuite rawn miah loin kum 2016, December 8, 2016 khan district thar pariat a siam a ni, an ti.

District thar siam an nih hnu, kum 2016, December 12-a Naga Consultative Meet-in district siam tharte sut leh tura phuta resolution an lo siamah, an dinna a la ngai reng tih an sawi a ni.