Meghalaya : BJP-in MDA-a tel chhunzawm chungchang ngaihtuah dawn

Bharatiya Janata Party (BJP) Meghalaya in-charge Chuba Ao chuan Meghalaya-a National People's Party (NPP) kaihhruai Meghalaya Democratic Alliance (MDA) sorkara an tel chhunzawm dawn leh dawn loh chungchang chu ngaihtuah thuai an tum tih a sawi.

Ao chuan state sorkar-in dik lo taka thil a tih dan hrang hrang document-te an party-in zawnkhawm a tum a, hei tihfel a nih hunah Enforcement Directorate leh Central Bureau of Investigation (CBI) an rawn che zui dawn a ni, a ti. "Party hruaitute chu level hrang hrangah inbiakna kan neihpui mek a, ṭangrual sorkara tel chhunzawm dawn leh dawn loh chungchang chu thla khat chhungin kan tifel ang," a ti.

BJP chu ṭangrual sorkar siamtu zingah tel mah se, an party chuan eirukna an ngaizam ngai dawn lo a, hei vang hian sorkar puhna hrang hrangte pawh document nen an zirchiang dawn tih Ao chuan a sawi. BJP tel lo chuan Meghalaya-ah eng party mahin sorkarna an siam thei dawn lo tih a sawi nghal bawk.