Zirna inah ruihhlo ṭhat lohzia inzirtir uar turin Tripura CM-in ngen

Tripura chief minister Manik Saha chuan an state-a ṭhalai, damdawi leh ruihhlo hmangsual an pung zel chu pawi a tih thu leh, ngaihven zui ngai tak a nih thu a sawi. Zirna inah ruihhlo ṭhat lohzia zirtir uar turin a chah.

Rabindra Satabarshiki Bhavan-a Mukhyamantri Sustha Sishu Sustha Kishore Abhiyan (MSSKA 3.0) session hawnna inkhawmah Chief Minister chuan, "Health infrastructure-te tichangtlungin, treatment facility thar leh changkang zawkte siam mah ila, kan ṭhalaiten ruihhlo an ngaih tlat chuan kan hnathawhte chuan awmzia an nei dawn lo. Ruihhlo do hna hi department chauhin a tih theih a ni lo, kan vaia kan thawhho a ngai a ni," a ti.

MSSKA 3.0 scheme hnuaia hian health worker-te chuan school leh college-te tlawh kualin, zirlai naupang leh tleirawlte hnenah health supplement-te an thlawnin an pe ṭhin dawn a ni. CM chuan health official-te chu zirna in an tlawhnaah hian zirlaite hnenah ruihhlo ṭhat lohzia, a nghawng hlauhawm theihziate zirtir nghal zel turin a chah.

"He programme hian school leh college zawng zawng a huam dawn vangin, official-te chuan ruihhlo hmansual hlauhawm zia chu zirlaite an sawipui ṭhin dawn a, hei hi an mawhphurhnaah an lak tel a ngai a ni," tiin CM chuan a sawi.

State mipuite pawh vaihhlo leh a kaihhnawihte zuk leh hmuam bansan turin a ngen bawk.

Health department-in tun hnaia zirchianna a neihah, West Tripura district-a zirna in 57-ah ruihhlo-a inchiu ṭhin, zirlai 193 an awm a, an zinga 62 chu HIV positive an ni tawh bawk. Heng zirna in 57 zinga 47 hi school niin, a bak chu college leh university an ni.