Assam : Sonitpur-ah eviction drive kalpui

Assam sorkar chuan Sonitpur district-a sorkar rama chengte hnawhchhuah hna chu Inrinni liam ta khan venhimna khauh tak hnuaiah a kalpui leh.

Police-te chuan eviction drive hi boruak ṭha tak hnuaiah neih a ni a, lo dodal leh buaina siam an awm lo niin an sawi. Zing dar 5 aṭangin hma an la ṭan a, tlai dar 5-ah zo felin ram acre 330-a zau chu an thianfai hman a ni.

Brahmaputra hmarlam kam, Barchalla-a No 3 Chitalmari area-ah hian dan loa in sakte chu excavator leh hmanraw dang 50 vel hmangin an tichhia.

A hmaa eviction drive neihnaah buainate a chhuah fo avangin, Inrinni pawh hian buaina chhuak thei venthawn thilah security mi leh sa 1,200 vel duty an ni. Mahse he biala chengte hi thuneitu lamin eviction notice an pek hnuah an lo inthiarfihlim vek a, hei vang hian boruak duhawm lo thleng a awm lo. He hmuna chengte hi kum eng emaw zat liam taa Brahmaputra chhim lam, Nagaon leh Maorigaon district aṭangin an chenna biala khawkheng thleng vanga rawn pem lutte an ni.