Manipur-a JD(U) MLA 5-in BJP zawm

Manipur-a Janata Dal (United) MLA panga chuan rorellai BJP an zawm. Inrinni liam ta khan chief minister N Biren Singh leh state BJP president A Sharma Devi-te chuan Delhi-ah an party-ah an lawmlut a ni.

Nitish Kumar kaihhruai, JD(U) in Bihar-a BJP an thawhpuina an tihtawp hnuah, Manipur-a JD(U) pawhin BJP kaihhruai sorkar an thlawpna an hnuhdawh tur thu an sawi. Mahse hemi hnu hian state JD(U) MLA pangate chuan BJP hi an zawm a ni.

Chief Minister chuan a official Facebook page-ah JD(U) MLA-te lawmna thu hi tarlangin, kum eng emaw chen aṭang khan MLA leh mi langsar tak takte chuan BJP chu an thlawp chho zel a ni, a ti. "Mipuiten prime minister Narendra Modi leh party president JP Nadda-te an rin tawk leh an duhzia a lang a ni," tiin a sawi.

Hetih lai hian JD(U) chuan an MLA uire te hi disqualify an nih theihna turin High Court-ah thlen an tum tih an sawi. State JD(U) president Ksh Biren chuan MLA pangate chet dan chu Constitution 10th Schedule bawhchhiatna a nih avangin, disqualify tura an nawr tur thu a sawi a ni.

Kumin March thlaa Manipur assembly inthlan neihah khan JD(U) hian seat ruk an la a, mahse an MLA pangate an uire tak avangin MLA pakhat chauh a nei ta a ni. MLA neihchhun Abdul Nasir pawh hi Delhi-ah a awm mek a, a awm zel dan tur pawh hriatchian a ni lo.

JD(U) MLA panga ten an zawm tak avangin, seat 60 awmna Manipur Assembly-ah hian rorellai, BJP chuan member 37 a nei dawn ta a ni.