Railway Project tihtawp theih a ni lo : Gohain

Union Minister of State for Railways Rajen Gohain chuan Meghalaya-a Khasi Students’ Union (KSU)-te'n Railway Project tihtawp phuta lungawi lohna an lantir chu pawi a tih thu sawiin, project chu tihtawp mai theih a ni lo tih a sawi. Rajen Gohain chuan Ri-Bhoi district-a project kalpui mek chu tihtawp mai theih a ni lo a, hna pawh thawh chhunzawm zel a ni ang, a ti. Sorkar laipui pawhin dodalna hi a pawm lo tih a sawi a, Khasi Students’ Union (KSU)-te chu inhnukdawk zawk turin a ngen.

Meghalaya-ah hian KSU bakah pawl hrang hrangte chuan Ri Bhoi district-a Tetelia-Byrnihat railway project kalpui duh lohna lantir hian nawrh an lo huaihawt tawh a, project hi tihtawp an phut a ni. Pawl pathum - Federation of Khasi-Jaintia & Garo People (FKJGP), Hynniewtrep National Youth Front leh Ri Bhoi Youth Federation-te chuan rel kawng sial chu dan loa hnam dang te lo luhna tur hmanrua a nih avangin an remti lo tih an sawi. Federation of Khasi-Jaintia & Garo People (FKJGP) president Wellbirth Rani chuan nawrh hi an huaihawt leh dawn tih sawiin, project hi tihtawp a nih hma loh chuan hma an la zel dawn tih a sawi. He railway project hi Meghalaya mipuite chimral theihna a nih avangin an do zel dawn tih a sawi a, Inner Line Permit (ILP) chu khauh zawka ken kawh an phut thu a sawi.

Kar kalta Zirtawpnia khan nawrh hi huaihawt a ni a, Ri-Bhoi leh East Khasi Hills district-ah chuan mi 10 vel man an ni. Kum 2013 khan pawl hrang hrangte chuan khauh zawka Inner Line Permit (ILP) kenkawh phutin nawrh an lo huaihawt tawh bawk.