Tripura by-election neih tura candidate 24 awm

Tripura assembly bial pali-a by-election neih tura candidate 24-in nomination paper an thehlut.

June 23-a by-election neih tura chuh tur zingah hian Tripura chief minister Manik Saha pawh a tel. Saha hi Rajya Sabha member ni lai leh state BJP president a ni. A ṭum khatna atan assembly inthlanah hian a chuh dawn a, Town Bordwali Assembly bialah a ding ang.

Chief minister hlui, Biplab Kumar Deb-a'n banna a thehluh hnuah May 15 khan Chief Minister atan lakluh a ni. MLA a nih loh avangin CM-a lakluh a nih aṭanga thla ruk chhungin Assembly member-ah thlan tlin a ngai a ni.

Kum 69 mi, Saha hian nomination paper thehluh hun tawp, Thawhṭanni khan thehlutin CM hlui Deb leh state BJP hruaituten an ṭawiawm a ni. A dinna tur, Town Bordwali Assembly bialah hian candidate dang paruk an awm dawn bawk.

Assembly seat pali-a candidate 24 zingah hian hmeichhia pariat an tel. BJP leh Trinamool Congress chuan hmeichhe candidate pahnih ve ve an nei a, CPI-M kaihhruai Left Party leh Congress chuan hmeichhe candidate pakhat ve ve an nei bawk.