Assam sorkarin bird park siam dawn

Assam sorkar chuan Silsako Beel ramah 'bird park' a siam dawn a, he park siamna atan hian cheng vaibelchhe 22 ruahman a nih thu urban affairs minister Ashok Singhal chuan a sawi.

May 13 khan Silsako Beel rama dan loa in sak za chuang zet chu ṭhiah a ni. Guwahati Municipal Development Authority (GMDA) chuan Silsako Beel ramah hian dan loa awm, chhungkaw 400 vel awmin, a ram bigha 1,800-ah bigha 1,000 vel chu an luah niin a sawi. Heng hmuna awmte chhuahtir an nih chungchang hi eptu pawlte chuan sawiselin, fundamental rights bawhchhiatna niin an sawi a ni.

Mahse wetland conservationist leh nature lover-te chuan sorkar hmalakna hi an thlawp a, wetland dang - Borsola, Sorusola leh Deepor Beel bakah river channel - Bhalaru, Bahini, Bondajan, Lakhimijan leh Khanajan-te pawh humhalh tura hma la turin an ngen.

Thing ṭiak nuai khat phun
World Environment Day pualin Pathianni khan Assam-a Golaghat district-a Dhansiri sub-division hnuaia thingtlang khuate chuan thing ṭiak nuai khat an phun.

Sarupathar bialtu MLA Bisjwahit Phukan chuan, ram acre 500 vela zauah thing ṭiak hi phun a nih thu sawiin, Nambor forest chu zauh zel an tum tih a sawi. Ramngaw zauhna tura an ram petute pawh zangnadawmna pek an tum thu a sawi bawk.

Thing ṭiak phun runpui neihnaah hian tualchhung mite bakah para-military force leh police-te pawh an tel a ni. Tractor eng emaw zat hmangin thing phunna tur ramte hi an let hmasa a ni.

Dhansiri sub-division huam chhunga mipuite chuan World Environment Day pual hian chhungkaw tinte chuan thing ṭiak 10 tal an phun thu sawiin, la phun belh zel an tum tih an sawi.