Assam : Dima Hasao rel kawng siamṭhatna turin Rs vbc 180 sanction

Assam-a tuilian leh leiminin Dima Hasao district-a Lumding-Badarpur section-a rel kawng a tihchhiat siamṭhatna turin sorkar laipui chuan Rs vbc 180 a sanction.

Kar liam ta khan ruahsur nasa vanga tuilian leh leimin nasa tak thleng chuan Lumding-Badarpur section-a rel kawng hi a tichhe vek a ni.

Chief minister Himanta Biswa Sarma chuan he thu hi a twitter-ah rel kawng siamṭhatna tur sum sanction a nih thu hi sawiin hna pawh thawh ṭan thuai a, July 10-a thawh zawh hman tum a nih thu sorkar laipui chuan a sawi a ni, a ti. CM Sarma hian Pathianni khan New Delhi-ah union railways minister Ashwini Vaishnaw a hmu a ni.

Assam-a tuilian leh leiminin hmun hrang hranga rel kawng a tichhiat avangin, Northest Frontier Railway (NR) chuan Lumding-Badarpur Hill section kaltlanga Barak Valley bakah Tripura, Mizoram leh Manipur-a rel service chu a titawp a ni.

Tuilian vanga thi mi 24 an tling tawh
Assam-a Pathianni khan tuilian vangin mi paruk an thih belh leh a, chhiatna thlenga thi hi mi 24 an tling tawh.

Pathiannia thi zingah hian naupang pahnih an tel. Tuilian tuar nasa ber, Nagaon district-ah mi pali chu tuiah an tlahlum a, Hojai district leh Cachar district-ah tuilian vang hian mi pakhat ve ve an thi bawk a ni.

Pathianni khan Indian Air Force chuan tuilian tuarte chhanchhuah leh chhawmdawlna sem hna an thawk chhunzawm zel. IAF hian An-32 transport aircraft pakhat, Mi-17 helicopter pahnih, Chinook helicopter leh ALH Dhruv-te chu chhanchhuah hna thawhna atan hian an hmang a ni.

Indian Army, State Disaster Response Force (SDRF), National Disaster Response Force (NDRF) leh volunteer-te chuan tuilian tuar mi 24,749-te chu hmun him lamah hruaichhuah an ni tawh.