NESO in Delhi-ah Citizenship Bill duh lohna lantir

North East Student Or­ganisation (NESO) chuan Nilaini khan New Delhi-a Jantar Mantar-ah Citi­zenship (Amendment) Bill 2016 duh lohna an lantir.

NESO-ah hian hmar­chhak zirlai pawl hrang hrang - Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) leh All Arunachal Pradesh Students’ Union (AAPSU)-te an awm a ni.

Nilaini-a Citizenship (Amend­ment) Bill 2016 duh lohna an lantirnaah hian NESO chairman Samuel Jyrwa, NESO Adviser Samujjal K Bhatta­charya, KSU President Lambok Marngar, NESO leh KSU GS Donald Thabah, KSU Delhi Unit President hlui Kynpham Kharlyngdoh leh Advocate Daniel Stone Lyngdoh bakah hmarchhak zirlai eng emaw zat an tel.

NESO hian hmarchhak state zawng zawngah NRC kalpui ngiatin, dan loa ramchhunga lut an awm ṭhin chungchang chu an la thutak hle tih an sawi. NESO chairman, Samuel Jyrwa chuan dan loa ramchhunga lut awm ṭhin hian state hrang hrangah kawng tam takin harsatna an thlen tih a sawi.

Tripura chuan an tribal nihna an hloh zo tawh tih sawiin, dan loa Bang­ladesh aṭanga lut tam tak an awm avangin chung mite chuan nakin lawkah Assam ram leilung fate chu an la tam khalh dawn niin a sawi bawk.