AFSPA chungchang ennawn a hun tawh: Manipur CM

Manipur Chief Minister N Biren Singh chuan Armed Forces (Special Powers) Act, hmarchhak hmun ṭhen khata hman mek chu ennawn a hun tawh thu a sawi.

N. Biren Singh chuan Manipur chu hmun ralmuang tak a nih tawh thu sawiin, hetih lai hian ram himna erawh ngaihpawimawh reng tur a nih thu a sawi a, ramdang aṭanga ralthuam tawlh ruk chu enliam mai chi a ni lo tih a sawi bawk.

Hetihlai hian General Officer Commanding (GOC) of 57 Mountain Division, Major General VK Mishra chuan state ralmuanna turin AFSPA chu a la ṭangkai niin a sawi thung.

Major General chuan AFSPA tel lo chuan hmalak a harsa tih sawiin Army ten hna ṭha taka an thawh theihna tur chuan AFSPA chu thil pawimawh a la nih reng thu a sawi a ni.

CM Biren Singh chuan Manipur dinhmun chu dinhmun danglam tak a nih thu a sawi ve bawk a, Kashmir ang a nih loh thu leh Kashmir-ah chuan Pakistan an inrawlh thu a sawi. Manipur-ah erawh chuan midang an inrawlh ve lo tih sawiin hemi anih avang hian security force-te tan pawh thil a harsa hle tih a sawi a, security force lam chu a thlawp loh thu sawi mah se thil chinfel harsa tak erawh a ni tih a sawi.

Manipur chu a ralmuang chho zel tih sawiin state khawpui Imphal-ah pawh Night life-te pawh a awm ṭan tawh tih a sawi bawk. State chhunga hel awm te nen pawh inremna an siam thuai a rin thu a sawi bawk.