Cachar-ah hel pahnih sawisa hlum

Assam-a Tinsukia-a Ben­gali panga thah an nih aṭanga ni hnih hnu Inrinni khan hel pahnih chu Cahchar mipuiten an sawisa hlum.

Sashastra Seema Bal (SSB) chuan Pathianni khan mipuiin an sawisak hlum te hnen aṭang hian China siam ralthuam tam tham tak an man tih an sawi.

SSB chuan tualchhung miten rinhlelhawm taka che mi paruk Harinagar market area-ah an hmu tih sawiin an zinga pahnihte hi mipuiten nasa takin an sawisa a, Police-te nen ṭangkawpa an chhanchhuah hnuah Silchar-a damdawi-in an panpui nghal tih sawiin, damdawi-in an thlen hnu hian thi-a puan an nih thu an sawi a ni. Midang pali hi chu an tlanchhe hman nia sawi a ni a, helte an zawn lai hian SSB leh police-te hian ralthuam ṭhahnem tak an hmuchhuak niin an sawi.

Heng helte hi eng hel pawl ami nge an nih tarlan a la ni lo a, Cachar Superintendent of Police Rakesh Roushan chuan tualchhung mite chuan ralthuam tam tham tak an hmuh avangin an khaw bei tura an rin avanga an mi rinhlelh te hi sawisa an nih thu a sawi ve bawk.

Silchar Medical College and Hospital chuan an dam­dawi-in thlenpui a nih chuan an thi tawh tih an sawi a, police-ten insawisakna hmun an thlen hi chuan an sawisaka te hi an na hle tawh nia sawi a ni bawk. Roushan chuan an chhuichian mek thu sawiin an sawisak hlumte hi Nationalist Socialist Council of Nagaland- Khapaland (NSCN-K) pawl ami te an nih an rinhlelh thu sawiin, NSCN(K) -te hi henglai hmunah hian an hluar hle niin a sawi bawk a ni.