Arunachal, Mizoram tan border panel siam a ni ve leh ang : Assam CM

Assam chief minister Himanta Biswa Sarma chuan Meghalaya nena ramri buaina chinfelna tur an buaipuinaa hma latu tur, regional committee an din ang khan Arunachal Pradesh leh Mizoram nena ramri buaina an neih mek buaipui turin din a ni ve leh dawn tih a sawi.

Haflong-a chanchinthar lakhawmtute a kawmaah, CM Sarma chuan Meghalaya nena ramri buaina chinfelna tur inremna te an tihfel hunah, Arunachal Pradesh leh Mizoram nena an buaina neih mek pawh buaipui chhunzawm a ni dawn a ni, a ti.

"Arunachal Pradesh nen chuan inbiakna kan nei mek tawh a, Mizoram nen pawh kan nei ve thuai ang. Theihtawp kan chhuah chuan, state pahnihte kan buaina pawh hi kan chinfel theih ngei ka ring a ni. Nagaland nena kan buaina erawh chu Supreme Court-in a ngaihtuah a, court thu angin a kal dawn a ni," tiin a sawi.

Assam leh Meghalaya hian ramri buaina an neihte buaipui tur hian regional committee pathum ve ve an din a, heng committee-te hian ramrite hi tlawhin, ramri hrula chengte pawh an kawmkual bawk a ni. Report hi state sorkarah an thehlut a ni a, state cabinet chuan an report hi an pawm ve ve tawh a, inremna hi tihfel thuai beisei a ni.