AP Lt Governor hmasa ber hnenah Arunachal Ratna hlan dawn

Arunachal Pradesh sorkar chuan an state-a chawimawina sang ber, 'Arunachal Ratna' chu Arunachal Lt Governor hmasa ber, K AA Raja hnenah a hlan dawn.

Raja hian a thih hnuah he chawimawina hi a dawng dawn a, Arunachal Ratna dawng thei pathumna a ni ang. A hmaa chawimawina lo dawng tawhte chu East Kameng district-a inkahna thlenga a nunna chan, deputy superintendent of police Bomto Kamdak leh India hnuaia Tawana awm theihna tura hma latu pawimawh, major Ralengo Bob Khathing-te an ni.

Lower Subansiri district headquarters, Ziro-a chief minister Pema Khandu kaihhruaia cabinet meeting neihah, Lt Governor hmasa ber hnena chawimawina hlan hi an rel a ni.

Cabinet meeting-ah hian Women Self Help Group ti ṭha zual 50 hnenah an hmalakna tichakna tura puihna tura Rs nuai khat pek te, Primary Level Federation 300 tan Rs nuai hnih ṭheuh pekte an rel bawk. Hei bakah hian Arunachal Pradesh aṭanga Class XII board examination zo, National Level Entrance Examination-a tling, IIT,IIM, NLU leh AIIMS a admission hmute hnenah 'Golden Jubilee Merit Award' Rs nuai hnih ṭheuh pek an ni bawk ang.

State chhunga sorkar school 50-te chu 'Golden Jubilee Model School' ah siam a, tihchangtlunna atan school pakhat tan Rs vaibelchhe 12 chin pek an ni dawn a, state golden jubilee lawm chhung, nakkum January 20 thlengin phyicial infrastructure 365 hawn hman tum a ni bawk a, hemi atan hian Rs vaibelchhe 50 ruahman a ni.