Sarma leh Sangma-ten Amit Shah an hmu

Assam chief minister Himanta Biswa Sarma leh Meghalaya chief minister Conrad K Sangma-te chuan Ningani zan khan union home minister Amit Shah an hmu a, state pahnih ramri paruka buaina an neih chinfelna tura an hmalaknate an sawipui.

State pahnih cabinet-te hian ramri buaina chinfel dan tur buaipuitu, regional committee report an pawm ve ve tawh a, natural boundary-a hman tur leh ramri hrula awm khua insem dan turte pawh an tifel tawh a ni. Cabinet-ten report an pawm hnuah, Ningani khan CM pahnihte hian report thehlut leh Amit Shah hmu turin Delhi an pan nghal a ni.

Amit Shah hnenah hian state pahnihte inbiakna neih dan te, regional committee report chungchangte an hrilh a, Amit Shah pawhin an hmalakna chu lawmawm a tih thu a lo hrilh. Ministry of Home Affairs (MHA) chuan report-te hi an lo endik leh ang a, January 26-ah CM pahnihte hian Home Minister hi an hmu leh ang.

Ramri hmun paruk an buaipui mek hi square km 36.79-a zau a ni a, committee-in rawtna an siamah chuan Assam lamin sq km 18.51 changin, Meghalaya-in sq km 18.28 a chang ang. Heng ram huamchhungah hian thingtlang khaw 36 a awm a ni.