Khasi Lineage Bill: KHADC in bill-a section ṭhenkhat paih dawn

Meghalaya-a Khasi Hills Autonomous District Councils (KHADC) Executive Committee chu vawiin hian an ṭhukhawm dawn a, Khasi Hills Autonomous District (Khasi Social Custom of Lineage) (First and Second Amendment) Bill chungchang an sawi ho ang.

KHADC CEM Hispreaching Son Shylla chuan bill chu section hnih lai mai an belh tawh avangin ennawn leh a ṭul thu a sawi.

Shylla chuan Khasi hmeichhia leh Khasi ni lo mipa inkara fa chu Khasi anga pawm an ni ang tih thu bill-a inziak chu paih a ṭul thu a sawi bawk.

Khasi Hills Autonomous District (Khasi Social Custom of Lineage) (Second amendment) Bill, 2018-ah hian Council chuan Principal Act Section 3 an siamṭha a ni.

Section 3(c) bakah seb-section thar Section 3(d) dah belh a ni a, hemi hnuaiah hian Khasi hmeichhia leh Khasi ni lo mipa inkara fa piang chu Khasi anga pawm an nih tawh dawn loh thu a inziak a , Khasi an nihna anga hamṭhatna pawh an dawng thei tawh dawn lo tih a inziak bawk.

Hetihlai hian Shylla chuan bill siamṭhat chungchangah hian state sorkar nen mumal taka inbiakna hian an nei lo tih a sawi a, state sorkar chuan Bill chu Council-a an thawn let leh theihna a sang hle niin a sawi.

KHADC CEM chuan state chhunga Autonomous District Council (ADC) dang pathum te pawhin an bill siam ang chu siam ve an tum tih a sawi a ni. Garo Hills Autonomous District Council(GHADC) chu a nihna takah chuan hetiang bill siam hmasa ber tu zawk an nih thu sawiin Jaintya Hills Autonomous District Council (JHACD) pawhin siam ve an tum tih a sawi bawk.

CEM chuan JHADC CEM, Madonbai Rymbai nen pawh hemi chungchangah hian Inrinni khan an inhmuh thu a sawi a ni.