Assam NRC tihdik dilna tihkhawtlai vangin lungawi lo

Assam National Register of Citizens (NRC) draft list-a hming awm lo te insawifiahna tur leh tihdikna tur form chu pekchhuah a la nih loh avang leh tihkhawtlai a la nih avangin mipuite an lungawi lo niin report chuan a tarlang.

NRC tihdikna form hi August 7-a pekchhuah tura tih kha a ni a, mahse thuneitu lam chuan an la tikhawltai leh rih a ni.

NRC Sewa Kendras (NSKs) chuan Zirtpawni aṭang khan mipuite hnenah NRC draft list-a an tel loh chhan insawifiah turin an hriattir ṭan tawh thung.

Report in a tarlan dan chuan sorkar laipui chuan NRC-draft list-a tel lo te insawifiahna leh tihdikna tur form a pechhuak tur a ni a, mahse mipuite chuan form ngaihtuaha kendra an va kalin form hi an la pechhuak thei lo a ni.

Hetihlai hian NRC official-te chuan hemi chung changah hian engmah thuchhuah an la siam lo thung a, mi ṭhen­khat chuan August 16 aṭang hian form a lakchhuah theih dawn tih an sawi thung.

NSK hnenah hian August 30 aṭanga Sep­tember 28 chhungin NRC tihdikna form hi a thehluh theih dawn a, hemi hnu hian list endikna hi neih a ni dawn a ni.

Assam NRC draft list hi July 30 khan tlangzarh a ni a, hetah hian Assam chief minister hlui, hmeichhe chief minister la awmchhun Syeda Anowara Taimur, president hlui Fakhruddin Ali Ahmed-a laichin hnaite hming chu a tel ve lo thung a, heng mite hian NRC update tur hian an apply duh lo nia sawi a ni.

Assam NRC hi diltu mi 3,29,91,384 an awm a, mi 2,89,83,677 chu list-ah hian telh an nih laiin mi nuai 40 chuang chu telh an ni lo thung.

Sorkar laipui chuan NRC list hi December 31, 2018 chuan zo hman turin an ti a, Supreme Court lam erawh chuan ni a la tuk lo thung a ni.