China-in AP-a hmun 15 hming thlak

China minsitry of civil affairs chuan Arunachal Pradesh-a hmun 15 chu an hming a phuah thar a, a hming phuah ang hian Chinese official map-ah hman a ni ang.

Hmun 15 hming a phuah leh an awmna lai tarlanna map hi Ningani khan a tichhuak a ni. Kum 2017 khan hmu paruk hming a lo phuah tawh bawk. Arunchal Pradesh hi China map-ah chuan 'Zangman' emaw 'South Tibet' tiin ziah a ni.

China-in hmun hming a phuah thar 15 zinga pariat hi residential area niin, tlang pali, lui pahnih leh mountain pass pakhat a tel bawk.

India ministry of external affair chuan China thiltih dan hi na takin a sawisel nghal. Ministry thupuangtu, Arindam Bagchi chuan, "Tun ṭum hi China-in Arunchal Pradesh state-a hmun hming a rawn phuah ṭhat vawi khatna pawh a ni lo. Arunachal Pradesh hi India ram chhung a ni a, a ni zel bawk ang. Arunachal Pradesh-a hmun hmingte a rawn phuah ṭhat avang hian he thudik tak hi a danglam phah chuang lo," tiin China-in a ram nia Arunachal a chhalna chu a chhang let a ni.

China-in hmun hming a phuah ṭhatte hi Shannan prefecture-a Cona county-a Sengkezong leh Daglugnzong, Medog conty-a Mani'gang, Duding leh Migpain, Zayu county-a Goling leh Damba bakah Lhunze county-a Mejag te, tlang pali - Wamo Ri, Deu Ri, Lhunzhub Ri leh Kumingxingze Feng, lui pahnih - Xenyogmo He leh Dulain He bakah mountain pass Se La te an ni.