Nagaland-a party leh tribal group-ten AFSPA pawhsei dem
Sorkar laipuiin Nagaland state-a thla ruk dang Armed Forces (Special Powers) Act (AFSPA) pawhseina tur thupek a tihchhuah chu state chhunga politcal party leh tribal group hrang hrangten na takin an sawisel.
State mipuite pawh an lungawi lo hle a, pawl hrang hrangte chuan sorkar thutlukna siam chungchangah lungawi lohna lantir an tum.
Nagaland-a all-party sorkar, United Democratic Alliance (UDA)-a tel, Naga People's Front (NPF) chuan thuchhuah siamin, December 23-a union home minister Amit Shah hoa AFSPA hlih phutna chungchang ngaihtuah a nih hnuah lawka a pawhseina thutluk siam chuan a ṭhawngin, in zah lohna lian tak a ni, an ti. Amit Shah hoa meeting neihah Nagaland chief minister Neiphiu Rio, deputy chief minister Yanthungo Patton leh NPF Legislature party leader TR Zeliang bakah Assam chief minister Himanta Biswa Sarma pawh a tel. Nagaland aṭana AFSPA hlih a nih dan tur ngaihtuah tur hian high-level committee din pawh an rawt a ni. Mahse meeting neih hnu lawk, Ningani khan sorkar laipui chuan AFSPA pawhsei a nih thu hi a puang leh nghal a ni.
State chhunga tribal pawl lian ber, Naga Hoho chuan state mipuite AFSPA hlih an phutna haider a, sorkar laipuiin a pawtsei leh ta zawk chuan a ṭhawng hle tih a sawi. Sorkar laipui Naga mipuite dikna chanvo chu a rahbeh sak chhunzawm zel a ni tiin, "India ram hi democracy ram dik tak a nih chuan, sorkar chuan mipuite aw chu a ngaithla tur a ni. Mahse hetiang ni loin Naga mipuite zahawmna leh dikna chanvo neihte chu zahsak an ni lo a, an mihringpui ang pawhin an ngaihtuah lo a ni," tiin an thuchhuahah an tarlang. Naga mipuite chu thil eng pawh thleng thei tura inbuatsaih lawk turin an chah bawk.
Naga zirlai pawl, Naga Student Federation (NSF) pawhin democracy kalphung zawm chungin, kawng hrang hrangin lungawi lohna lantir an tum tih an sawi. "India sorkarin a rilru a thlak duh tlat loh avangin, Naga mipuite pawh kum thar aṭang chuan anmahni hmachhawn tur hian an inbuatsaih a ngai dawn a ni," tiin an thuchhuahah an sawi.