NESO-in AFSPA hlip turin sorkar laipui an ngen

Hmarchhak zirlai pawl intelkhawm, North East Students' Organisation (NESO) chuan Nagaland-a security force-te pawikhawihna lian tak a thlen hnuah, sorkar laipui hnenah sipai hnenah thuneihna sang pekna, Armed Forces Special Powers Act (AFSPA) chu hmarchhak bial aṭanga hlip turin an ngen.

NESO chuan hemi chungchangah hian thuchhuah siamin, hmarchhak mipuite an ngaihtuah a, an ṭhatna tur a duh takzet a nih chuan dan sakei tia sawi ṭhin, AFSPA hi hmarchhak bial aṭangin a hlip tur a ni, a ti. He dan hi hlih a nih loh chuan hmarchhak bial mipuite chu enhran an ni zel dawn a ni, a ti.

Sorkar laipui chuan hmarchhaka muanna a awm a duh tak tak lo a, sipai hnena thuneihna sang tak an pek hmang hian hel laka beihpui thlak chhuanlama hmangin, ram leilung fate chu aw chhuah thei loa awpbeh an tum nia an ngaih thu NESO chuan an sawi bawk.

NESO bakah civil society group, rights activist leh political leader hrang hrangte chuan hmarchhak bial hmun ṭhenkhata AFPSA hman mek hlip turin sorkar laipui an phut nghal bawk. AFPSA hlip tura phuttu zingah hian Meghalaya chief minister Conrad K Sangma pawh a tel.

AFSPA hi Assam, Nagaland, Manipur (Imphal Municipal Council area huam tel loin), Arunachal Pradesh-a Changlang, Longding, Tirap district leh Assam border bula police station pariat huam chhungah hman mek a ni.

Nagaland chief minister Neiphiu Rio chuan AFPSA pawhsei zel a nih chungchangah sorkar laipui chu a sawisel a, "Kumtinin sorkar laipui chuan Nagaland chu ram buai, 'disturbed area' a ni tiin AFSPA hi a pawtsei ziah a ni. Helpawlte chuan inkahhai puangin, remna kawng zawnga inbiaknaah pawh an tel tawh a, engvangin nge he dan hi pawhsei a nih zel?," tiin a lawm loh thu a sawi bawk.