Guwahati tlangval pahnih thihna thubuaiah mi pahnih man leh
Assam-a Karbi Anglong-a Guwahati tlangval pahnih thah an nih thubuai kalzelah kar liamta Zirtawpni mi pahnih man an ni leh a, police official-te chuan tlangval pahnih thah vang hian mi 30 an man tawh thu an sawi.
Assam Police thupuangtu chuan an mi man te hming pawh hi an puangzar a, Nilotpal Das (29) leh Abhijeet Nath (30) te thihna thubuai kal zelah mi 60 man an nih tawh thu police-te chuan an sawi a, an zinga mi 30 hi chu tualthahnaa inhnamhnawiha puh an nih vanga man a ni a, a dang 30 erawh hi chu hate message leh thuthang dik lo social media-a vawrhdarh vanga man an ni thung.
June 8 khan Das leh Nath-te hian Karbi Anglong-a Kangthilangso waterfall an en a, an let lehlam chu Panjuri Kachari khaw mipui ten naupang rukbo hmang emaw tiin an motor aṭangia hnukchhuakin nasa takin an sawisa a, an nunna an chan phah hial a ni.
Thah an nih lai hi video-a lak niin social media-ah an la thehdarh zui bawk a ni.
Zirtawpni hmasa zawk khan All Assam Students’ Union leh tribal pawl 28 aiawh te chuan Assam Director General of Police Kuladhar Saikia chu hemi chungchangah hian an lo hmu tawh a, tualthattute lakah action la ngei tura an phut thu an lo hriattir tawh bawk.
Ningani khan Assam Chief Minister Sarbananda Sonowal chuan he tualthahnaa inhmanhnawih te lakah action na taka an lak dawn thu a lo sawi tawh bawk a ni.
Assam Human Rights Commission team pawhin tlangval pahnih thah an nihna hmun hi an tlawh tawh a, thil awmdan an enfiah tawh nghe nghe. He pawikhawihna hi ramchhung mai bakah ram pawnah thleng pawhin mi hrang hrangin an dem thu an sawi.
He thila a hnarkaitu bera puh Alfajoz Timung chu Zirtawpni khan bail-a chhuah a ni a, Timung hian tlangval pahnih hi naupang rukbo chingah puhin thu a than tir a, phone hmangin an motor lo tiding turin a ti bawk a ni.