Assam Congress-in fuel man sang duh lohna lantir

Assam Congress party chuan fuel leh nitin mamawh man sang zel duh lo avanga lungawi loin, Ningani khan state pum huapin nawrh an huaihawt.

Assam Pradesh Congress Committee hruaitu leh worker-te chuan fuel leh thil man sang zel chungchangah centre leh state-a BJP kaihhruai sorkar mawhphurtuah puhi, BJP sorkar an duh loh thute an aupui a ni. Nawrh huaihawt hi October 30-a by-election neihna tur - Tamulpur, Mariani, Thowra, Gossaigaon leh Bhabanipur constituency-ah neih a ni lo a, hmun dangah erawh chuan neih vek a ni.

Party member-te chuan BJP sorkar chuan inthlan dawna mipuite a lo tiam hrang hrang - petrol, diesel, LPC cylinder leh nitin mamawh thil dang mante a thunun tur thu a sawi chu a taka tihhlawhtling thei lohah an puh.

Meghalaya Congress hruaituin state sorkar sawisel
Meghalaya Congress president Vincent Pala chuan an state chhunga fuel man sang zel khuahkhirh thei loah puhin, Meghalaya Democratic Alliance (MDA) sorkar chu na takin a sawisel bawk.

Vincent Pala chuan a ṭum khatna atana state chhungah petrol litre khat man chu digit thum a tling chho tih sawiin, fuel man sang zel chuan state mipuite laka nghawng ṭha lo tak a thlen dawn a ni, a ti. State economy, a bikin rural area-ah pawh nghawng pawi tak a nei dawn niin a sawi.

An party chuan fuel man sang chak lutuk avanga lungawi lohna hi lantir an tum a, mahse hri leng avang leh by-election neih a nih dawn avangin nawrh an huaihawt ta lo tih a sawi bawk.