Tripura police leh VHP activist-te innawr buai

Bangladesh-a Hindu sakhaw hmun pawimawh leh Hindu sakhaw zuitute beih an nih duh lohna lantira Vishaw Hindu Parishad(VHP)-ten Ningania lungawi lohna an lantirnaah Tripura police-te nen an innawr buai a, mi palin hliam an tuar.

Tripura police-te hian VHP kawng­zawhte chu Gamati district-a Udaipur area-ah an kal an remti lo a, hei hi duh lohin VHP mi leh sate hian nawr luiin, police duty-te chu lungin an tawng zui a ni. Inspector general (Law and Order) Arindam Nath chuan mipui leh police-te hi an innawr zui tih sawiin, security mi leh sa pathum leh VHP activist pakhatin hliam an tuar tih a sawi.

Tualchhung thuneitute chuan buaina thleng vang hian nimin aṭang khan punkhawm khapna thupek an tichhuak nghal a ni.

Police officer chuan VHP-ten kawng an zawh chu boruak ṭha lo thleng thei nia thu an dawn avangin tawp turin a ti a, mahse an thupek hi an zawm duh lo niin a sawi. Hetih lai hian local RSS leader Abhijit Chakraborty chuan boruak ṭha lo thleng tur angin mi ṭhenkhatin police-te hi thu dik lo an hrilh niin a sawi thung. Police-te nena an inawrbuainaah hian VHP mi leh sa 12 in hliam an tuar niin a sawi bawk.

Tripura sorkar chuan Ningani aṭanga ṭan tura a tih, ni thum awh tur Bang­ladesh Film Festival, Agartala-a neih tur pawh a lo ṭhulh tawh bawk a ni.