Nagaland leh Latvia sorkarin choir & voice workshop buatsaih dawn
Nagaland chief minister Neiphiu Rio chuan Latvia embassy nena thawk dunin, a thlawnin ni li chhung choir & voice workshop an buatsaih dawn tih a sawi.
Chief Minister Rio chuan he workshop hi tualchhung musician-te chawhphurna atan leh, hma an sawnna tura buatsaih tum a nih thu sawiin, November 8-11 chhungin Dimapur-a Mountain Music Academy-ah neih a ni dawn a, India rama Latvia ambassador Artis Bertulis-a'n a hawng dawn tih a sawi. Workshop kharna hi November 13-ah Kohima-a Regional Centre of Excellence for Music & Performing Arts (RCEMPA)-ah buatsaihin, concert neih a ni ang.
Task Force for Music and Arts (TaFMA) advisor Theja Meru chuan kum 2020, October 2-a Nagaland sorkar leh Latvia embassy-ten memorandum of understanding (MoU) an lo ziah tawh angin he workshop hi buatsaih a ni dawn tih a sawi. MoU hi Delhi-ah Nagaland CM Rio leh Latvia ambassador Bertulis-ten an ziak a ni.
Workshop-ah hian Latvia-a choir conducting expert-te chuan Naga musician-te chu class an neihpui dawn a, live performance, technique, individual lesson, live choir lesson leh a dangte an zir ang.