CAA in hnukkir lo a nih chuan Assam, Tripura leh Meghalaya telh ve suh u : TIPRA chairman

Tipraha Indigenous Progressive Regional Alliance (TIPRA) chair­man Pradyot Bikram Manikya Debbarma chuan sorkar laipui hnenah sawizui hlawh tak, Citizenship Amendment Act (CAA) chu hnukkir leh turin a ti a, an hnukkir lo a nih pawhin he dan hmanna turah hian Assam, Tripura leh Meghalaya chu telh lo turin a ti.

Debbarma chuan, "Sorkar laipui hian CAA hi West Bengal inthlana an chak theihna tura hmang chauh a ni a, inthlan a zo tawh bawk a, he dan hi hnukkir leh tawh rawh se. Anih loh chuan Assam, Tripura leh Meghalaya chu min telh ve suh se," tiin Itanagar-a National People’s Party (NPP) state unit-in conclave a buatsaihah a sawi.

TIPRA hotu chuan hmarchhak bial mipuite chuan CAA hi Assam tan a him lo a nih chuan hmarchhak state dang tan pawh a him lo tih an hriatthiam a ngai tih sawiin, Arunachal Pradesh tan a him lo a, Tripura pawh a him lo a, Mizoram pawh a him dawn bik lo a ni, a ti. Hei vang hian hmarchhak mipuite chuan he inṭhenna policy dodalna kawnga inlungruala aw an chhuah a ṭul thu a sawi bawk.

Debbarma chuan politics chu inthlan ringawt ni loin, policy chungchang a ni tiin, "Centre-ah BJP emaw, Congress emaw sorkar an dinin, Delhi aṭanga policy siam chu an kalpui a, hmarchhak bial tana thutlukna leh policy-te chu he bial nena inzawm­na pawh nei miahloten an siam ṭhin. Hmarchhak mite chuan an state ngeiah anmahni tana an beih te a ngai a ni," a ti. Hmarchhak mipuite chuan an culture ngaipawimawhtute chu an dah pawimawh a ṭul a ni tiin, inthlak danglam an duh chuan huai takin an beih let a ngai a ni,a ti. An state tana hmasawnna tura hmathlir nei ṭha, mi dikte chu an thlan chhuah a ngaih thu a sawi a, inthlan dawna pawisa sem ṭhinte chu hnawl ngam tur leh, an pawisa semte pawh mipui chanpual vek a ni tih theihnghilh lo turin a ti bawk.