Central team-in Assam tuilianin chhiatna a thlen dan enfiah

High-level inter-ministerial central team chuan Assam district hrang hranga tuilian leh leimini'n chhiatna a thlen dante an enfiah a, state sorkar chuan thil chhiate siamṭhatna turin sorkar laipui chu fund pe chhuak thuai turin a ngen.

Central team hian October 19 khan Assam hi an thleng a, team member hi pasarih niin ministry of home affairs-a joint secretary Manish Tiwari-a'n a ho a ni. Thawhlehni leh Nilaini khan Bongaigaon, Chirang leh Lakhimpur district-a chhiatna thlenna hmun hrang hrangte an enkual bakah harsatna tawk chhungkaw ṭhenkhatte an kawm bawk. Nilaini khan Guwahati-ah Assam sorkar official-te nen meeting an nei leh nghal a ni.

Assam State Disaster Manage­ment Authority (ASDMA) chuan central team hnenah hian tuilian leh leiminin thil a tihchhiat dante hrilhin, heng thil chhiate siamṭhat lehna din tharna atan cheng vaibelchhe 1088.19 pe tura an dil thu a sawi. Heng sumte hi National Disaster Response Force (NDRF) hnuaia a rang thei anga be tura an ngen thu an tarlang.

Tiware chuan report hi sorkar laipui hnenah an thlen thuai tur thu a sawi ve bawk.

Kumin chhungin Assam-a district 34 zinga 28-ten tuilian hi an tuar tawh a, hetih lai hian nikum aiin kumin tuilian hian chhiatna a thlen nasa lo zawk nia sawi a ni. Tuilian hian district hrang hranga mi nuai kua chuang a nghawng a ni.