Hmarchhakah ILP system hman ni rawh se : AASU chief adivisor
All Assam Students' Union (AASU) chief advisor Samujjal Bhattacharya chuan New Delhi-a press conference a neihah, hmarchhak pumah Inner Line Permit (ILP) system hman an phut tih a sawi.
Sorkar laipuiin dan siam thar, Citizenship (Amendment) Act, 2019 hnuaiah he dan hi Inner Line Permit (ILP) hmanna state leh 6th Schedule area-ah te hman a ni ve dawn lo tih tarlan a ni. Hei vang hian sawisel hlawh tak, CAA hi hmarchhak pumah hman a nih ve lohna turin ILP huam tir vek an duh tih a sawi a ni.
Bhattacharya chuan, "CAA hi thil ṭha lo tak a ni tih kan hre vek a, hei hian hmarchhak tan nghawng ṭha lo tak a nei ngei dawn a ni. He dan hi a ṭhat loh avangin hmun ṭhenkhat chu huam tel tir a ni lo ngei a, mahse a huam telte tan pawh hian eng kawngin nge a ṭhat theih bik ang," a ti. AASU hruaitu chuan CAA hian Assam leilung fate dikna chanvo neihte a palzut sak a, an political rights, culture leh social identity dinhmun pawh a tiderthawng a ni, a ti.
Assam chief minister Sarbananda Sonowal chu 'phatsantu' tiin, mipuite ngaihsan rawn a nihna aṭangin dan loa an state-a lutte humhimtuah a inlet ta a ni, a ti. "Dan loa rawn lutte hnawhchhuah vek tiam chungin thuneihna a chang a, tunah erawh chuan heng mite humhim tumin a thawk ta zawk a ni," tiin a sawi. Bhattacharya chuan Assam leh hmarchhak pum chuan CAA chu eng kawng mahin an pawm ngai dawn lo tih a sawi. Centre-a BJP kaih-hruai sorkar laipui chu mipuite ṭhendarhna policy kalpuiah a puh bawk.