ILP neih nan chuan thisen chhuah pawh inhuam

Meghalaya-a pressure group hrang hrang chuan sorkar laipuiin state leilung fate hrekbehna tur dan a siam chhunzawm zel chuan theihtawpin an bei let dawn a, a ṭul a nih chuan thisen chhuah pawh an inhuam tih an sawi. 

Thawhlehni khan South West Khasi Hills district-a Balal-ah Citizenship (Amendment) Act (CAA) duh lohna lantira tour programme an buatsaihah, KSU president Lambokstar Marngar chuan, "Sorkar laipuiin leilung fate rahbehna tur dan a siam zel a nih chuan, kan theih ang angin kan bei let ang. Pentui hmanga kan bei let thei tawh lo a nih chuan, thisen hmangin kan bei mai ang," a ti. 

State sorkar pawhin Assembly-a ILP hman phutna resolution pass a nih avang ngawtin inthlahdah mai lo turin an phut tih a sawi bawk. ILP chu a taka hman a nih thuai theihna turin sorkar laipui an nawr zawk tur a ni, tiin a sawi. 

Hynniewtrep National Youth Front (HNYF) general secretary Sadon Blah pawhin sorkar laipuiin CAA kalpui a tum chu 'silai hmang tura inzirtirna ang a ni', a ti. "India sorkar chuan kan dawhtheihna avang hian min namnul tum suh se, silai hman pawh kan thiam tho a ni," a ti.